ತಿರುಪ್ಪಾವೈ -ಉಪನ್ಯಾಸ -ಬಿ.ಶ್ರೀರಾಮಮೂರ್ತಿ ಯವರಿಂದ

ಪದ್ಯ-೩
ಬಹಳ ಎತ್ತರವಾಗಿ ಬೆಳೆದು ಲೋಕಗಳನ್ನೂ ಅಳೆದ ಪುರುಷೋತ್ತೋಮನಾದ ಪರಮಾತ್ಮನ ನಾಮವನ್ನು ಹಾಡಿ, ಸೇವಕರಾದ ನಾವೆಲ್ಲರೂ ನಮ್ಮ ವ್ರತಾಚರಣೆಗಾಗಿ ಸ್ನಾನವನ್ನು ಆಚರಿಸಿದರೆ, ದೇಶದಲ್ಲೆಲ್ಲಾ ಅತಿವೃಷ್ಟಿ, ಅನಾವೃಷ್ಟಿ, ದುರ್ಭಿಕ್ಷಾದಿಗಳು ಇಲ್ಲದೆ ತಿಂಗಳಿಗೆ ಮೂರುಮಳೆಯಾಗಿ ಗದ್ದೆಗಳಲ್ಲಿ ಕೆಂಪುಬತ್ತಗಳು ಚೆನ್ನಾಗಿ ದೊಡ್ಡದಾಗಿ ಬೆಳೆಯುತ್ತವೆ. ಅವುಗಳ ಪಾತಿಗಳ ಮಧ್ಯದಲ್ಲಿ, ಮೀನುಗಳು ಉರುಳಿ ಆಟವಾಡುತ್ತಿರುತ್ತವೆ. ನೈದಿಲೆ ಪುಷ್ಪಗಳು ಅರಳುತ್ತವೆ. ಅವುಗಳ ಒಳಗೆ ಭ್ರಮರಗಳು ನಿದ್ರೆಮಾಡುತ್ತವೆ. ಶ್ರೇಷ್ಠವಾದ ದೊಡ್ಡಹಸುಗಳು ಧೈರ್ಯದಿಂದ ದೃಢವಾಗಿ ಕುಳಿತು ಕ್ಷೀರಭರಿತವಾದ ಕೆಚ್ಚಲನ್ನು ಹಿಡಿದು ಹಾಲು ಕರೆದಾಗ ಕೊಡಗಳು ಹಾಲಿನಿಂದ ತುಂಬುತ್ತವೆ. ನಾಶವಾಗದ ಐಶ್ವರ್ಯವು ನಮ್ಮದಾಗಿರುತ್ತದೆ, ಮತ್ತು ನಮ್ಮ ಈ ಅದ್ವಿತೀಯವಾದ ವ್ರತವು ಸಿದ್ದಿಸುತ್ತದೆ.