ತಿರುಪ್ಪಾವೈ-ಶ್ರೀ ಬಿ.ಶ್ರೀರಾಮಮೂರ್ತಿಯವರಿಂದ ಉಪನ್ಯಾಸ.

ಪದ್ಯ -೬
ಏನೂ ಅರಿಯದ ಓ! ಚಿಕ್ಕ ಹುಡುಗಿಯೇ! ಬೆಳಗಾಯಿತು. ಪಕ್ಷಿಗಳು ಕೂಡಾ ಚಿಲಿಪಿಲಿಗುಟ್ಟುತ್ತಾ ಶಬ್ದಮಾಡುತ್ತಿವೆ. ಪಕ್ಷಿರಾಜನಾದ ಗರುಡನಿಗೆ ಪ್ರಭುವಾಗಿರುವ ಪರಮಾತ್ಮನ ದೇವಾಲಯದಲ್ಲಿ ಬಿಳಿಯ ಶಂಖದ ಮಹಾನಾದವನ್ನು ಕೇಳಲಿಲ್ಲವೇ? ಬೇಗ ಏಳುವವಳಾಗು. ರಾಕ್ಷಸಿಯಾದ ಪೂತನಿಯ ವಿಷಭರಿತವಾದ ಸ್ತನ್ಯಪಾನಮಾಡಿ ಗಾಡಿಯರೂಪದಿಂದ ಬಂದ ವಂಚಕ ಶಕಟಾಸುರನನ್ನು ಅವನ ಬಲವೆಲ್ಲಾ ನಾಶವಾಗುವಂತೆ ಕಾಲಿನಿಂದ ಒದೆದು, ಕ್ಷೀರಾಬ್ದಿಯಲ್ಲಿ ಆದಿಶೇಷನಮೇಲೆ ಮಲಗಿ ಯೋಗನಿದ್ರೆಯಲ್ಲಿರುವ ಜಗತ್ಕಾರಣಿಭೂತನಾದ ಪರಮಾತ್ಮನನ್ನು, ಮನಸ್ಸಿನಲ್ಲಿ ಧ್ಯಾನಿಸುತ್ತಾ, ಮುನಿಗಳೂ, ಯೋಗಿಗಳೂ, ಮೆಲ್ಲನೆ ಎದ್ದು "ಹರಿ ಹರಿ" ಎಂದು ಹೇಳುವ ಮಹಾಘೋಷವು ನಮ್ಮ ಹೃದಯದೊಳಗೆ ಪ್ರವೇಶಿಸಿ ನಮ್ಮ ಮನಸ್ಸಿಗೆ ತಂಪನ್ನುಂಟುಮಾಡಿ ನಮ್ಮ ಸಂತಾಪವನ್ನು ಹೋಗಲಾಡಿಸಿದೆ. ನಮ್ಮ ಅದ್ವಿತೀಯವಾದ ಈ ವ್ರತವು ಶುಭವಾಗಿ ನೆರವೇರುತ್ತದೆ.